بنتي بلا عقل في ورطة
_ ملوش لازم الكلام ده يا عدلي.. احنا في مصيبة سودة..
_ ما انا عرفت ان انتوا في مصيبة سودة.. وعارف مين اللي كان سبب فيها، وتأكد بنفسي دلوقتي.. بس اقول ايه؟ مراتك كانت هتخرب الدنيا.. وانت علشان تنفي التهمة عن نفسك رايح تجيب دجال نصاب يبهدل بنتك؟
_ وانت عرفت منين يا عدلي؟
الأم واقفة ساكتة.. الأب مش عارف يتكلم.. مكسوف من أخوه اللي هو فعلا غلط لما راح يحكي سره للدجال، وطنش أخوه، علشان مراته دايما بتزرع فيه كره اخواته.سيف بدأ بالكلام.. وحكاله كل حاجة لحد اللحظة اللي دخل فيها عدلي..
_ انت امرأة سوء.. طول عمرك سوء.. كنتي شاكة في كل دول.. ومعرفتيش تدافعي عن نفسك لما سألك الدجال بتروحي فين.. طول عمرك بتكرهيني وبتحقدي عليا علشان ظروفي المالية متيسرة، مع إني عمري ما قصرت معاكم، لكن انتوا اللي بترفضوني معرفش ليه، الحقد خليكي تبعدي عني أخويا وابن أخويا، وابقى ممنوع من دخول من بيتكم، مع ان أخوكي بيقعد هنا بالشهر..
انتي بريئة من تهمة الدجال ده انك عملتي في بنتك كده، بس للأسف.. والحقيقة اللي جوزك ميعرفهاش، إن الحقد اللي جواكي عليا وعلى مراتي وعيالي.. خلاكي تسحبي بنتك في يدك كل كام يوم، وتروحي تتسولي بيها في السيدة زينب مرة، وفي الحسين مرة، وتقولي بنتي معاقة وعايزة عملية، وجوزي ميت، وأفلام حمضانة..
